Мүдделер қақтығысы, әлде бюджет қаражатын тиімсіз пайдалану ма?
Бизнестің құқықтары мен мүдделерін қорғаудың қолданыстағы құралдарының бірі прокуратурамен, әсіресе мобильді топтармен өзара іс-қимыл жасау болып табылады. Олардың рөлі орасан зор.
Мәселен, ШҚО кәсіпкерлер палатасы директорының құқықтық мәселелер жөніндегі орынбасары Әлия Мұқашеваға мобильді топ арқылы Самар ауданында мемлекеттік сатып алуды өткізудің ашықтығы мәселесі бойынша Алматылық кәсіпкер жүгінді.
Әлия Орымбекқызының айтуынша, кәсіпкер тапсырыс беруші бәсекелестік ортада сатып алу шараларын орындамаған.
«Оны бірден Самар ауданының прокуроры Айдос Тұрсыновқа тапсырып, ол өз кезегінде аталған тендер бойынша тексеруді ұйымдастырды», - деді Әлия Мұқашева.
Тексеру нәтижелері бойынша бейнебақылау құрылғысына және қатты тұрмыстық қалдықтар полигонын қоршауға сатып алу тікелей шарт жасасу арқылы бір көзден алу тәсілімен жүргізілгені, бәсекелестік ортада конкурс өткізу жөнінде шаралар қабылданбағаны анықталды.
Сондай-ақ, Самар ауданының прокуратурасы жұмыстардың құны айтарлықтай төмен бағаланғанын анықтады.
«Істі қарау кезінде мемлекеттік сатып алуды ұйымдастырушы өз кінәсін даулаған жоқ. Бірақ түсініктемелерде егер бәсекелестік ортаға берілсе, онда мерзімдер кешіктіріліп, орындалған жұмыстардың сапасы зардап шегеді», - делінді Самар аудандық сотының қаулысында.
Барлық мән-жайларды ескере отырып, сот жауапты тұлғаға 369 200 теңге көлемінде айыппұл түрінде әкімшілік жаза қолданды. Екі лоттағы бұзушылықтарды ескере отырып, айыппұл 700 мың теңгеден асты.
Алайда, ведомстволық тұлға қаулымен келіспей, Шығыс Қазақстан облыстық сотының қылмыстық істер жөніндегі сот алқасына апелляция берді. Шағым қанағаттандырусыз қалдырылды.
«Аудандардағы жергілікті атқарушы органдар әлі күнге дейін «Мемлекеттік сатып алу туралы» заңды бұзады, сайланған кәсіпорындардың мүдделерін қолдайды, бюджет қаражатын ұтымсыз бөледі», - деп есептейді Әлия Мұқашева.
Айта кетейік, осы жылдың 9 айында ШҚО бойынша мобильді топқа 80 қоңырау түскен. Олардың 29-ы бойынша сұрақтар шешілді, 5-і бойынша мәліметтер расталмады. Қалғандары бойынша түсініктемелер берілді.
Облыстың барлық аудандарында кәсіпкерлердің құқықтарын қорғау бойынша мобильді топтар құрылды. Топ құрамына прокуратура мен кәсіпкерлер палатасының өкілдері кіреді.
ШҚО кәсіпкерлер палатасы Самар ауданының прокуроры Айдос Тұрсыновқа мобильді өтінішті жедел қарағаны және мәселені шешкені үшін алғысын білдіреді.
Пікір қалдыру:
Пікірлер: